រាជធានីភ្នំពេញ៖ នាយកដ្ឋានប្រឆាំងបទល្មើសបច្ចេកវិទ្យា បានធ្វើការចែករំលែកនូវបទពិសោធន៍ខ្លះៗ ស្តីពីបច្ចេកទេសដែលអាចលួចទិន្នន័យពីទូរស័ព្ទ ឬឧបករណ៍អេឡិចត្រូនិច ពីការប្រើប្រាស់ប្រព័ន្ធសាកថ្ម ឬភ្ជាប់ទៅនឹងឧបករណ៍អេឡិចត្រូនិចផ្សេងៗ នៅទីសាធារណៈ ឬគ្មានប្រភពច្បាស់លាស់ ដែលបានរៀបចំប្រព័ន្ធបច្ចេកទេសពីជនអនាមិក។

បច្ចេកទេស (Juice Jacking) គឺជាបច្ចេកទេសមួយដែលជនអនាមិកប្រើប្រាស់ដើម្បីចូលមើល និងលួចទិន្នន័យពីឧបករណ៍អេឡិចត្រូនិក ដោយប្រើប្រាស់ប្រព័ន្ធសាកថ្ម ឬភ្ជាប់ទៅនឹងឧបករណ៍អេឡិចត្រូនិចផ្សេងៗ ក្នុងទីសាធារណៈ ឫឧបករណ៍អេឡិចត្រូនិចគ្មានប្រភពច្បាស់លាស់ ដែលអាចអោយជនអនាមិក ប្រើប្រាស់ការភ្ជាប់នោះដើម្បីចូលទៅក្នុងឧបករណ៍របស់អ្នក ដើម្បីលួចទិន្នន័យពីទូរស័ព្ទ ឬគ្រឿងអេឡិចត្រូនិចរបស់អ្នកបាន។

គោលបំណងនៃការប្រើប្រាស់បច្ចេកទេសនេះមានដូចជា៖
១. លួចព័ត៌មានផ្ទាល់ខ្លួន ដូចជាអ៊ីមែល អ៊ីនធឺណិត ឯកសារ រូបភាព និងវីដេអូ។
២. លួចព័ត៌មានហិរញ្ញវត្ថុ ដូចជាគណនីធនាគារ ឬ ព័ត៌មានផ្សេងៗពាក់ព័ន្ធនឹងសេវាហិរញ្ញវត្ថុ។
៣. ដំឡើងមេរោគ (Malware) ដើម្បីកាន់តែត្រួតពិនិត្យឧបករណ៍របស់អ្នកនៅពេលក្រោយ។

ដោយឡែក បើតាមនាយកដ្ឋានប្រឆាំងបទល្មើសបច្ចេកវិទ្យា វិធីសាស្រ្តការពារអាចអនុវត្តបានតាមវិធានការខ្លះៗដូចខាងក្រោម៖
១. ប្រើកន្លែងសាកថ្ម ឬការភ្ជាប់ជាមួយគ្រឿងអេឡិចត្រូនិចផ្សេងៗ ដែលអាចជឿជាក់បាន និងមកពីសាខា ឬក្រុមហ៊ុនដែលគេទទួលស្គាល់។
២. អនុវត្តការពារ និងចាក់សោរទៅលើឧបករណ៍ទូរស័ព្ទរបស់អ្នក។
៣. ចៀសវាងការភ្ជាប់ឧបករណ៍របស់អ្នកទៅនឹងកន្លែងសាកថ្ម ឬគ្រឿងអេឡិចត្រូនិចផ្សេងៗ នៅទីសាធារណៈ។
៤. ប្រើតែខ្សែសាកដែលសាកបានតែថ្មតែប៉ុណ្ណោះ (charging-only cable) ដែលមិនអនុញ្ញាតឱ្យផ្ទេរទិន្នន័យ។

នាយកដ្ឋានប្រឆាំងបទល្មើសបច្ចេកវិទ្យា បានក្រើនរំលឹកដល់សាធារណជន មេត្តាប្រុងប្រយ័ត្នចំពោះការភ្ជាប់ទូរស័ព្ទ ឬគ្រឿងអេឡិចត្រូចនិចរបស់ខ្លួន នៅតាមទីសាធារណៈ ឬភ្ជាប់ទៅនឹងគ្រឿងអេឡិចត្រូនិចផ្សេងៗ ដែលមានប្រភពមិនច្បាស់លាស់ ដើម្បីជៀសវាងការលួច និងគ្រប់គ្រងទិន្នន័យរបស់ខ្លួនពីជនអនាមិក ដែលអាចបណ្តាលអោយមានហានិភ័យផ្សេងៗជាយថាហេតុ៕